Deputeti dhe nënkryetari i Partisë Demokratike, Enkelejd Alibaej, në një intervistë për mediat, foli për zgjatjen e afateve të vettingut.
Sipas tij, shtyrja e afateve të organeve të vettingut nuk është çështje emergjente, pasi në ndryshimet kushtetuese të vitit 2016 ishte parashikuar zgjidhja edhe për këtë rast.
“Nuk ka ngërç. Kushtetuta parashikon që në momentin kur përfundon afati pjesën e mbetur duhet te ushtrojnë KLGJ dhe KLP, kjo është në ndryshimet e kushtetueses së 2016-ës e duartrokitur nga të gjithë. Kërkohet vetëm zgjatje afati? Çfarë do te thotë kjo nga KPK të shkojë në KLGJ, pra nga motra e Ballukut te shkoje tek kunati i Kodhelit?” – u shpreh Alibeaj.
Nëse SHBA-BE mund të çojë një kërkesë për këtë gjë, nënkryetari demokrat thotë se para mbërritjes tek një vendimmarrje duhet bërë një analizë se përse në 5 vite nuk përfundoi vettingu. Kjo mund të lexohet edhe si një qëndrim kundër i PD-së për zgjatjen e afatit të vettingut.
