Deputetja e Partisë Demokratike, Dhurata Çupi, ka treguar sot gjatë një interviste televizive se, opozita do të diskutojë me ekspertë të fushës për të hartuar një Reformë Territoriale në shërbim të qytetarëve.
“Ne do të propozojmë një hartë elektorale objektive, për shkak se nuk determinojmë dot vendimmarrjen. Së dyti, opozita do të ketë të kombinuar mendimin politik me mendimin e ekspertëve. Pra, do të ketë grupe ekspertësh nga qeverisja vendore dhe mendimi i tyre do të përvëloje mbi aspektin elektoral, me qëllim që të kemi një Reformë Territoriale të thellë, ku qytetari të ndihet i pari”, theksoi Çupi.
Kur u pyet për një formulë ekzakte për reformën e korrigjuar, Çupi u shpreh se akoma nuk kanë arritur në një raport final. Por që mendojnë të zhvillojnë takime intensive për të dalë me materiale objektive.
“Opozita e ka ngritur në mënyrë të vazhdueshme si problematikë rishikimin e Reformës Territoriale. Kërkojmë ndryshimin e hartës territoriale dhe kemi kërkuar edhe mbështetjen e deputetëve të mazhorancës për të miratuar një reformë të gjithë pranuar”, shtoi Çup.
Një nga amendamentet që PD do të paraqes në Kuvend është pikërisht për ndryshimet që kërkojnë të bëhen në reformën territoriale dhe gjithashtu në atë zgjedhore.
