Një nënë shqiptare në Itali, ka tronditur opinionin publik pasi për të kërkuar drejtësi, ajo vendosi të tregojë fotografitë e kufomës së djalit të saj, Maringleno Dodaj, në shenjë proteste, para gjykatës së Ternit.
Lena Dodaj është nëna e Maringleno Dodaj, një punëtori që vdiq në punë në moshën 25 vjeç, më 18 nëntor 2011, pasi ra nga çatia e një kompanie në Narni Scalo.
Mëngjesin e kësaj të marte ajo u shfaq para gjykatës së Ternit me një poster të madh ku ishin vendosur fotot e të riut, të zhveshur dhe pa jetë, në hollin e urgjencës së spitalit Santa Maria, ku ishte shtruar pas aksidentit në punë.
Këto foto gruas i ranë në dorë nga dosja e prokurorisë, ndërkohë që një hetim është hapur lidhur me këtë ngjarje të rëndë. Megjithatë ende nuk është zbuluar se pse trupi i të riut ishte i zhveshur dhe i lënë në dyshemenë e hollit të spitalit ku pas aksidentit në punë u shtrua për të marrë ndihmë mjekësore.
‘’Ndihem e gënjyer! E shtrinë në dyshemenë e hollit të Urgjencës të spitalit Santa Maria’’ janë fjalët rrëqethëse të nënës shqiptare. ‘’Jam e tronditur! Djali m’u poshtërua edhe i vdekur’’ shtoi më pas gruaja.
Pavarësisht thirrjeve të vazhdueshme të gruas shqiptare, hetimet që përfshijnë personelin shëndetësor tashmë janë arkivuar disa herë.
“I bëj thirrje prokurorit të Perugia që të ndërhyjë në çështjen tmerruese” tha ajo, duke shpjeguar se është e gatshme të vazhdojë protestën e saj edhe para zyrave gjyqësore të Perugias.
