Duke diskutuar për ngjarjen e rëndë e ndodhur me katër turistët rusë në hotelin e Qerretit në Kavajë, gazetari Spartak Koka ka zbuluar në emisioni “Opinion” se 3 muaj më parë po në këtë hotel ka humbur jetën një shtetas polak rreth moshës 55 vjeç.
“Në të njëjtin hotel, para 2-3 muajsh ka gjetur vdekjen dhe një shtetas polak, 55 vjeç. Në të njëjtin hotel, në të njëjtën SPA. Sipas ekspertizës mjekoligjore, shkaku i vdekjes është vënë arrest kardiak për këtë shtetasin polak. Dyshohet fillimisht që të ketë përdorur lëndë narkotike. E kam të konfirmuar dhe nga policia e Kavajës, edhe nga Prokuroria e Kavajës këtë dhe është vendosur mosfillim i çështjes” – është shprehur Koka.
Gjithashtu në emison u bë me dije se deri në ditën që kanë ndërruar jetë, rusët kanë lëvizur nëpër Shqipëri në vende të ndryshme. Në datën 15 tetor kanë dalë dhe janë nisur për të Qafë Thanë, për të shkuar në Maqedoninë e Veriut, por më parë kanë ndaluar në Librazhd për të konsumuar drekë së bashku me 4 rusët e tjerë që i shoqëronin.
Edhe në kthim janë ndalur sërish në Librazhd, ndërsa në hotel kanë mbërritur në orën 20:00, ku edhe kanë kërkuar që të përdornin pishinën dimërore. Aty u gjetën pa shenja jete, ndërsa kamarieri, i cili është student i Mjekësisë ka tentuar që t’u jepte ndihmën e parë, por pa efekt. Ndërsa Policia është thirrur në orën 22:10.
