Deputetja Elda Hoti dyshohet se ka shkelur ligjin për dekriminalizimin, pasi ka fshehur ndryshimin e gjeneraliteteve të të atit. Hoti u zgjodh deputete për qarkun e Lezhës.
Në KQZ është depozituar një ankesë, ku thuhet se Hoti ka fshehur ndryshimin e emrit të babait të saj nga David Hoti, në Artan Hoti. Shkresa në fjalë, mban firmën e ankuesit i cili është Llesh Nikolli.
Personi në fjalë, kërkon hetimin në lidhje me rastin në fjalë, ku bëhet me dije se ndryshimi i emrit është bërë në vitin 2002, por deputetja nuk e ka deklaruar atë në formularin e vetëdeklarimit.
“Kjo deputete në vetëdeklarimin e saj ka fshehur ndryshimin e emrit të babait të saj nga David Hoti, në Artan Hoti. Ky ndryshim është bërë më datë 30 prill 2002 dhe kandidatja për deputete znj. Elda Hoti nuk e ka deklaruar në formularin e vetëdeklarimit. Duke fshehur këtë të dhënë te gjeneralitetit të saj, znj. deputete nuk mund të përfaqësojë komunitetin në parlamentin shqiptar. Pasi ne si komunitet duam njerëz dinjitozë, me figurë të pastër që të ulen në foltoren e parlamentit dhe të përfaqësojnë me ndershmëri dhe devotshmëri interesat tona. Kjo deputete përse e ka fshehur këtë ndryshim, e ka harruar, apo babai i saj ka pasur një të shkuar kriminale ku është dënuar për disa vepra të rënda penale, si ajo e trafikimit të lëndëve narkotike dhe trafikim të qenieve njerëzore”, shkruhet në ankesën dërguar KQZ.
Elda Hoti rrezikon të humbasë mandatin e deputetes, por do të jetë Komisioni Qëndror i Zgjedhjeve ai i cili do të vendosë.
