Filmi “Zgjoi”, i cili u kandidua edhe për “Oscar”, ka triumfuar në edicionin e 43-të të Festivalit Mediteran të Filmit “Cinemed” në Francë, duke u shpërblyer me çmimin kryesor “Golden Antigone”.
Lajmi është bërë i ditur nga një postim në Facebook i aktores që luan rolin kryesor në film, Yllka Gashi, e cila ndër të tjera dha lajmin se ky është çmimi i 13-të për këtë film.
“Edhe një sukses i radhës për filmin “Hive-Zgjoi” me skenar e regji të Blerta Bashollit!!! “Hive – Zgjoi” sonte ka triumfuar edhe në Francë, duke u shpërblyer me çmimin e 13-të ndërkombëtar përkatësisht duke marrë çmimin kryesor “Golden Antigone” në edicionin e 43-të të Festivalit Mediteran të Filmit “Cinemed” në Montpellier të Francës”, ka shkruar Gashi në postim.
Kujtojmë që të premten, 22 tetor “Zgjoi” u dha premierë për herë të parë edhe në Kosovë.
Të pranishëm në premierë ishin edhe shumë prej personazheve publikë, përfshirë edhe krerë të lartë të shtetit, si Presidentja Vjosa Osmani dhe Kryeministri Albin Kurti.
Me suksesin e madh ndërkombëtarë të këtij filmi, Qendra Kinematografike e Kosovës ka propozuar për nominim në festivalin e ndarjes së çmimeve botërore për kinematografi, Oscars.
