Deputeti i PD-së Tritan Shehu ka deklaruar ditën e sotme se ai mbështet përpjekjet e Berishës për ngritjen e Kongresit, duke thënë se kështu mund t’i kthejnë partisë atë që meriton. Sipas Shehut, Kongresi do tregojë që ky vend duhet të eci me liri dhe demokraci të vërtetë, madje do të eliminojë gabimet e bëra deri më tani nga drejtuesi aktual.
“Kongresi, eveniment demokratik për një parti demokratike! Veçanërisht kur e kërkon shumica dërmuese e pjesëmarrësve të tij. “Vox populi, vox Dei” – thoshin dikur latinët: këtë nuk duhet ta harrojë kërkush! Kongresi është një kuvendim i gjerë, shkëmbimi mendimesh, debatesh…Kongresi, edhe referendumet janë momente ku merr forcë vota e lirë, njerëzit! Kjo është demokracia me pjesëmarrjen e anëtarësisë në vendimmarrje, zgjerimin e bazës së dialogut, me mundësinë për të arritur në konkluzione sa më të drejta, racionale, duke minimizuar gabimet e rritur transparencën”, shkruan ai.
Sipas tij, të tilla aktivitete, kongrese, debate janë pjesë e aktivitetit demokratik të çdo force politike perëndimore, që është apo aspiron të kthehet në maxhorancë. “Të tilla aktivitete, kongrese, debate janë pjesë e aktivitetit demokratik të çdo force politike perëndimore, që është apo aspiron të kthehet në maxhorancë. Kjo është e vërteta dhe këtu jo vetëm nuk ka asnjë fije anti perëndim, anti amerikanizëm, anti europianizëm, por përkundrazi kjo nevojë është e bazuar mbi atë eksperiencë e përvojë, pjesë e së cilës jemi dhe ne si anëtarë të PPE”, shprehet ai. Ndërkohë, Berisha ka njoftuar se në “foltoren” e radhës do vendosë se kur do të mblidhet Kuvendi.
