Epidemiologu, Ilir Alimehmeti, ka deklaruar ditën e sotme se javët e fundit po përjetojmë një rritje të rasteve të reja me COVID-19. Sipas tij, një nga shkaqet kryesore është se me uljen e temperaturave njerëzit qëndrojnë të grumbulluar në ambiente të mbylla, ndërsa përmendi si shkak edhe rastin e mbushjes së stadiumit me 22 mijë tifozë kur lozi skuadra e kombëtares.
“Gjatë muajit tetor, patëm një rënie të vazhdueshme të rasteve, deri nga 15 tetori. Tani po përjetojmë një rritje të re të rasteve. Le të shpresojmë që është diçka që do të zbresë, por për momentin nuk ka dhënë shenja. Spitalet kanë qëndruar gjatë këtij muaji 150-160 shtruar, në mënyrë të qëndrueshme. Me ftohjen e motit, njerëzit kanë tendencë që të qëndrojnë në ambiente të brendshme, kemi pasur aktivitete me grumbullime të mëdha, siç ishte ndeshja e kombëtares. Grumbullimet e këtij tipi ne duhet t’i evitojmë. Të kesh vetëm infektime, nuk ka ndonjë shqetësim të madh, duhet të shohim humbjet e jetës, kjo është e dhënë kryesore, shtrimet në spital dhe humbjet e jetës”, tha ai.
Sipas mjekut, deri në fund të tetorit nuk priten ulje të infektimeve, por as shifra të rrezikshme nuk parashikohen.
