Skuadra e Tiranës është fituesja e derbit të kryeqytetit. Bardheblutë mundën rivalët e përbetuar të Partizanit me rezultatin minimal 1-0. Një sfidë thuajse e barabartë dhe e luftuar nga të dyja skuadrat. Ndeshja nisi me incidente nga shkallët e stadiumit teksa pati konfrontime edhe në fushë nga lojtarët. Në fundin e fraksionit të parë, Tirana fitoi një penallti teksa gjyqtari Hamiti u konsultua në VAR duke akorduar me plot bindje penallti për Tiranën pas ndërhyrjes së Belicës ndaj Tolit.
Nga pika e bardhë e 11-të metërshit mesfushori Vesel Limaj tregohet i saktë duke mposhtur portierin Alban Hoxha që hidhet në krahun e kundërt. Me avantazhin e Tiranës përfundon pjesa e parë e lojë. Fraksioni i dytë startoi me Partizanin më kërkues për golin teksa të kuqtë krijuan disa raste por në fund nuk i’a dolën të gjenin rrugën e rrjetës. Tirana nga ana tjetër kërkoi golin e sigurisë por nuk rrezikoi shumë në sulm për të ruajtur balancat në fazën mbrojtëse.
Në minutat e fundit të ndeshjes Tirana u shfaq disa herë rrezikshëm duke përfituar nga hapësirat që la Partizani por nuk e shfrytëzoi momentin. Në fund derbi u fitua nga skuadra e trajnerit Orges Shehi që ruan ngjitet në kuotën e 14 pikëve në kampionat dhe shkëputet në tre pikë nga vendi i dytë. Për Partizanin zhgënjimi është i madh pasi vijojnë me krizën e rezultateve. Të kuqtë nuk e kanë siguruar ende fitoren e parë në këtë edicion.
