Policia italiane ka shkatërruar një bandë shqiptare e cila merrej me trafik droge në vendin fqinj. Nga ky aksion 7 persona janë arrestuar, 2 janë lënë në arrest shtëpie, ndërsa 5 të tjerë kanë mundur të arratisen.
Banda, e cila operonte si kartel mafioz merrej me shpërndarjen e drogës, zhvatje, rrëmbime, grabitje, ndërsa gjatë operacionit u sekuestruan 2 kg kokainë.
Personat e akuzuar kishin precedentë në fushën e drogës dhe i përkisnin një familjeje të rrënjosur tashmë në strukturën sociale dhe ekonomike të L’Aquila, të lidhur me njëri-tjetrin me qëllim blerjen, paketimin dhe shpërndarjen e drogës në zona të ndryshme të vendit.
Në krye të grupit ishin 3 vëllezër të cilët bënin gjithë organizimin e punës, ku pjesë e skemës ishin njerëz të besuar të tyre, kryesisht me lidhje gjaku. Ata përdornin kode për të komunikuar e ndarë detyrat, ku bisedat bëheshin në “Whatsapp” apo në aplikacionin tjetër, tashmë tejet të përdorur “Telegram”.
Policia ka njoftuar se aksioni do të vijojë sërish për arrestimin e personave të tjerë të përfshirë.
