Ambasadorët Kim e Soreca kanë zhvilluar një takim me Kreun e KQZ, Ilirjan Celibashi.
Soreca ka zbuluar dhe temat e diskutuara ku njëra prej tyre është vlerësimi për 25 Prillin dhe tjetra në lidhje me zgjedhjet e ardhshme, ku është treguar dhe plani i KQZ.
“Bisedë e mirë sot me Kryetarin e KQZ-së Ilirjan Celibashi dhe me Ambasadoren e Shteteve të Bashkuara në Shqipëri Yuri Kim. Kryetari na informoi mbi (1) vlerësimin përfundimtar të KQZ-së për procesin zgjedhor të 25 prillit, përfshirë çështjen e rëndësishme të identifikimit biometrik, dhe (2) për planin e ardhshëm të KQZ-së në funksion të zgjedhjeve të ardhshme”, shkruan Soreca në Twitter.
Ambasadori ka vlerësuar Celibashin dhe punën e bërë nga KQZ.
“Është e rëndësishme të adresohen rekomandimet e OSBE ODIHR shumë përpara kohe. Të gjitha rekomandimet e ODIHR-it duhet të ndiqen nga të gjithë aktorët shqiptarë përgjegjës në kuadrin e një reforme zgjedhore gjithëpërfshirëse.
Parregullsitë dhe pretendimet në lidhje me zgjedhjet e fundit duhet të hetohen tërësisht nga autoritetet kompetente, siç theksohet në Raportin 2021 të Komisionit Evropian për Shqipërinë .BE do të vazhdojë të sigurojë mbështetjen e nevojshme për KQZ-në në funksionet e saj thelbësore”, ka reaguar Soreca.
Ndër të tjera, Soreca thekson se për të gjitha parregullsitë e zgjedhjeve të fundit, duhet të hetohet tërësisht nga autoritetet kompetente.
