Ngjarja e 21 janarit nuk do të marrë zgjidhje, kjo për arsyen se të gjitha palët janë të përfshira, kështu mendon ish-presidenti Bamir Topi.
Sipas tij, nuk ka pasur shpresë se kjo çështje do të shohë dritës e zbardhjes. Sipas tij, ka pasur dhe një komision hetimor, por që nuk vendosi asgjë. Topi ka akuzuar dhe kryeministrin, duke pohuar se ky i fundit betohej e stërbetohej se do të zbardhte ngjarjen, por nuk bëri asgjë.
“Në këndvështrimin politik, është një ngjarje ku janë të gjithë palë dhe në fund fare në komisionin parlamentar sulmohen të gjithë me përjashtim të opozitës. Tani pse nuk ka proces politik për 21 janarin nga 2013 e deri më tani? Kush është personi apo institucioni që është i interesuar? Nuk ka as proces politik, as nuk ka shenjë për një proces juridik”, u shpreh Bamir Topi.
Në fjalët e tij duket qartë se bën me faj jo vetëm mazhorancën e asaj kohe, por edhe opozitën, e cila nuk e mbajti fjalën. Menjëherë pas ardhjes në pushtet, ndërrimit të qeverive, ata e harruan “21 Janarin”.
Në 21 janar 2011 u zhvillua një protestë e madhe në kryeqytet, ku gjatë saj humbën jetën 4 protestues, konkretisht Aleks Nika, Ziver Veizi, Hekuran Deda dhe Faik Myrtaj. Partia Socialiste, aso kohe ishte në opozitë dhe ishte kjo forcë politike që organizoi protestën. Në lidhje me ngjarjen në fjalë, nuk pati kurrë një zbardhje të plotë, pavarësisht se kanë kaluar 10 vite.
