Përfaqësuesi i Sindikatës së Fermerëve, Ervin Resuli, ka folur ditën e sotme në lidhje me problematikën e denoncuar ditët e fundit nga fermerët për dëmet që i shkaktoi përdorimi i farës së domates “Ozgan”. Gjatë një interviste televizive ai tha se dëmi i shkaktuar llogaritet deri në 1.8 milionë euro në total. Sipas tij, të prekur nga kjo farë që dështoi në prodhimin e këtij sezoni, janë rreth 400 fermerë, kryesisht në zonën e Myzeqesë. Ndër të tjera ai tha se, fermerët kërkojnë një takim me ministren e Bujqësisë, nga e cila kërkojnë të gjendet një zgjidhje për këtë situatë, ndërsa barra më madhe bie mbi ata që kanë futur në vendin tonë farën e domates.
“Jemi kontaktuar nga zëvendësministri për të patur një takim, që në fakt nuk ka ndodhur ende. Dje kemi patur një mbledhje nga përfaqësia e fermerëve për një datë brenda kësaj jave për protestën e radhës. Janë diku mbi 400 fermerë dhe dëmi llogaritet rreth 1,5 apo 1,8 milionë euro në total. Ne kurrsesi nuk kërkojmë që ministria të paguajë dëmin e shkaktuar nga fara e domates në lekë, pasi nuk është edhe objekt i ministrisë që të paguajë. Por ne kërkojmë që ministria të bëjë albitrin e ndershëm që të ndajë, të thënë në gjuhën popullore, “shapin nga sheqeri”. Faji është i atij që fut farën. Ai që ka futur farën e skaduar të dëmshpërblejë fermerët. Ose manipulimi ka ndodhur gjatë aktit të mbjelljes së fidanit”, u shpreh ai.
Ndër të tjera ai akuzon qeverinë se ka publikuar një raport pa firmë dhe pa vul, ku thotë se ka zhvilluar kontrolle, për të fshehur kështu të vërtetën.
