Igli Allmuça, ish-futbollist i skuadrës së Kukësit dhe Dinamos ka analizuar vigjiljen e përballjes e cila do të luhet ditën e premte në “Air Albania” e vlefshme për javën e 7 të kategorisë superiore. Ai ka theksuar se të dyja skuadrat kanë potencialin e mjaftueshëm për t’i shkaktuar probleme njëra-tjetrës.
“Së pari, dua të them për Dinamon se e ka fituar tashmë një titull, e ka fituar pa nisur kampionati. Kur them këtë kam parasysh faktin se ka kaluar nga asgjë në gjithçka. Pra, ishte një skuadër pa asgjë, kurse tani është në elitë dhe i ka të gjitha ato që i duhen. Dinamo ka një të ardhme të sigurt dhe ky është titulli i parë që ajo ka fituar këtë sezon. Skuadra më pëlqen, lojtarët që ka afruar në merkato më pëlqejnë dhe mendoj dhe besoj se do të jetë aty mes pretendentëve.
Kukësi më ka befasuar pozitivisht me mënyrën si luan. Skuadra sillet shumë lirshëm në fushë dhe kjo është pozitive. Nuk ka asnjë lloj kontraktimi, duket sikur po bën një ndeshje miqësore. Është për t’u veçuar ky fakt, sepse kjo ndodh vetëm te Kukësi. Patjetër që ka të bëjë dora e trajnerit dhe stafit të tij dhe drejtuesve të klubit. Kukësi, për këto vite që është në Superiore, ka pasur gjithmonë siguri financiare dhe skuadra të forta, por këtë lojë nuk e kam parë më parë. Për mënyrën e lojës më duket skuadra më konstante e kampionatit”, thotë Allmuça.
