Kryetari i Prishtinës, Shpend Ahmeti, ka reaguar për herë të parë në lidhje me lajmet që qarkullojnë se mes tij dhe trajnerit të futbollit, Afrim Toverlani ka patur një konfrontim fizik.
Në media u tha se Toverlani ka shkuar në shtëpinë e Ahmetit që ta sulmojë atë me thikë, por kjo gjë është përgenjeshtruar nga Ahmeti, i cili thekson se nuk ndihet i kërcënuar.
“Falemnderit të gjithëve për pyetjet e kujdesin. I pash edhe titujt ne portale. Nuk ka pas kurrfarë ballafaqimi fizik e as luftë më thika. Afrimin e njoh moti dhe e kam mik. Ka qenë mbrëmë të shtëpia kur nuk kam qenë unë dhe e ka thirr vetë policinë e cila me të arritur e ka arrestuar. Nuk ndihem as i kërcënuar e as i rrezikuar nga Afrimi edhe pse vizitat e vona në shtëpi kur nuk jam prezent dhe me fëmijë të mitur prezent nuk janë të mirëseardhura. Mirëpo, nuk ka pas as fjalosje e as ndonjë fjalë të rëndë me fëmijet dhe familjen. Shpresoj që këtë incident Afrimi ta sqaroj e kaloj sa më lehtë me organet e rendit. Duke e pas mik qe një kohë të gjatë nuk besoj që ka pas qëllim të sulmit apo kërcënimit”, – shprehet ai.
