Noteri i njohur në Sarandë Thoma Kaçi ra pre e grabitjes një javë më parë. Disa persona të maskuar dhe të armatosur u futën me forcë në banesën e tij dhe nën kërcënimin e armës i vodhën 20 milionë lekë të vjetra dhe euro.
Nga kjo ngjarje, 63-vjeçari mori lëndime dhe përfundoi në spital.
Policia e Sarandës bën me dije sot se ka gjetur armën e përdorur në grabitje të llojit kallashnikov dhe e ka dërguar atë në laboratorin e Policisë Shkencore në Tiranë për ekzaminime të mëtejshme, me qëllim identifikimin e autorëve të ngjarjes.
Si ndodhi grabitja
Ngjarja ndodhi mëngjesin e 20 tetorit në momentin kur Kaçi po dilte me gruan dhe djalin nga banesa e tyre në mëngjes. Në atë moment ata dëgjuan derën të hapej nga dy grabitësit e maskuar dhe të armatosur. Nën kërcënimin e armës ata i detyruan të futen sërish brenda duke i lidhur në karrige dhe më pas u bënë presion për t’u treguar se ku i fshihnin paratë. Pas kërcënimeve të vazhdueshme Kaçi u tregoi se ku ndodheshin paratë. Ata morën 20 mln lekë të vjetra në banesë dhe më pas u larguan. Noteri arriti të telefonojë policinë dhe ishin efektivët që e liruan nga karrigia.
