Pas vendimit për kalimin në pronësi të Bashkisë, Policia e Tiranës ka rrethuar Sarajet e Toptanëve. Masa e ndërmarrë vjen fill pas vendimit të KM për kalimin e pronësisë tek Bashkia.
Vendimi vjen menjëherë pas incidentit të rreth 1 muaji më parë ku Sarajeve iu vu flaka. Pronarët do të shpronësohen dhe dëmshpërblehen.
Efektivë të shumtë të Policisë Bashkiake kanë rrethuar sarajet, ndërsa kanë vendosur edhe shiritin që nuk lejon kalimin e qytetarëve por edhe pronarëve.
Mirëpo, sipas një denoncimi, vendimi për rrethimin e Sarajeve është bërë pa us hpallur më parë VKM-ja. Sipas këtij denoncimi, policia nuk lejon as pronarët të futen në Sarajet e Toptanëve, me këta të fundit që nuk e pranojnë VKM-në.
Rikujtojmë se shpronësimi i Sarajeve të Toptanëve ka kaluar në një sërë debatesh pasi këtyre të fundit iu vu flaka në gusht të këtij viti. Kryetari i Bashkisë akuzoi se Sarajeve i është vënë zjarri qëllimisht, por ai shtoi se aty nuk do të ketë ndërtim pavarësisht këtyre përpjekjeve. Ai shtoi se kjo godinë do të kthehet në muze.
Sakaq, opozita ka akuzuar Bashkinë se po tenton që edhe këtë pjesë të historisë ta tjetërsojë me kulla.
