Komisioni Hetimor për zgjedhjet e 25 prillit ka zgjedhur sot sekretarin e saj. Emri i propozuar nga nënkryetari i Komisionit, Tonin Gogu, ishte ai i deputetit socialist, Klevix Xhoxhi. Emër ky që gjeti dhe miratim nga ana e demokratëve, pasi ishin të gjithë votat pro, asnjë kundër, asnjë abstenim.
Më pas, deputetja socialiste Blerina Gjylameti kërkoi që mbledhjet e këtij komisioni të zhvillohen në orën 17:00, duke qenë se më herët mbahen edhe komisionet e tjera parlamentare.
“Duke qenë se jemi në një periudhë ku do të diskutohet buxheti në Kuvend, duhet të kemi parasysh që mbledhjet e komisioneve, ku shqyrtohen projektbuxhetet përfundojnë në orën 15:00, unë propozoj që të mblidhemi në orën 17:00”, u shpreh ajo.
Ky propozim i saj u aprovua nga kreu i Komisionit.
