Në kohën kur Partizani ndodhet në një krizë të thellë rezultatesh, drejtori i përgjithshëm i klubit Olsi Rama gjen kohën dhe shijon live sfidën hapëse të javës së 7 të Kategorisë Superiore, Dinamo-Kukësi. Siç shihet edhe në foto, Rama është nën shoqërinë e drejtuesit tjetër të Partizanit, Gjergji Xharo. Partizani i ka ezauruar ndeshjet ndaj Dinamos dhe Kukësit në fazën e parë të kampionatit dhe studimi i kundërshtarit nuk bën një sens llogjik në këtë moment. Ajo që të bën të mendosh është se dy drejtuesit e skuadrës së Partizanit kanë piketuar ndonjë prej lojtarëve që janë në fushën e lojës.
Tek kryeqytetasit nuk janë aspak të lumtur me kontigjentin që kanë në dispozicion dhe në merkaton e janarit pritet të bëhen ndryshime në formacionin e trajnerit Ilir Daja. Është vetëm fillimi i kampionatit dhe në media nuk qarkullojnë emra për të cilët Partizani është i interesuar por kuptohet që diçka ka filluar të lëvizë. Prania e dy drejtuesve të lartë të skuadrës së Partizanit, Olsi Rama dhe Gjergji Xharo në ndeshjen Dinamo-Kukësi është një indicie që të kuqtë e kryeqytetit kanë piketuar ndonjë element të rëndësishëm.
