Shefi i Zyrës së BE-së në Kosovë, Tomas Szunyog ka folur për këndvështrimet e ndryshme që kanë shfaqur me qeverinë në lidhje me procesin e Vettingut. Ai thotë se nuk kanë probleme me qeverinë e Kosovës sa i përket sistemit të drejtësisë.
“Si ne ashtu edhe qeveria kemi mendime të njëjta se sistemi i drejtësisë duhet të funksionojë më mirë dhe në mënyrë më efikase, por ne thjesht kërkojmë që të koordinohemi dhe konsultohemi për hapat e qeverisë”, tha ai në Rtv Dukagjin.
Ai ka folur edhe rreth procesit të liberalizimit të vizave për kosovarët, duke thënë se institucionet e Kosovës duhet t’i bindin 27 vendet e BE-së për liberalizimin e vizave.
“Personalisht nuk ndihem shumë rehat sepse vij nga një vend si ish-Çekosllovakia, tani Republika Çeke, që ende kishte ndalesë udhëtimi që në moshën 23-vjeçare nuk mund të udhëtoja në Europën Perëndimore, kështu që personalisht e kuptoj këtë frustrim shumë mirë”, tha Szunyog.
Szunyog thotë se edhe Bashkimi Evropian dëshiron që në Kosovë të ketë luftë më efikase kundër krimit dhe korrupsionit.
