Në një intervistë për mediat, ish-kreu i Komisionit Qendror të Zgjedhjeve, Kristaq Kume ka folur për ndryshimet kushtetuese që kërkon Partia Demokratike. Sipas tij, kjo kërkesë bëhet për qëllime politike.
Kume tha se kërkesa e PD-së duhet të ishte për ndryshimin e sistemit, dhe se rruga që kërkojnë demokratët për koalicionet me lista të ndara do ta fragmentarizonte votën.
“Është një sjellje jokorrekte e PD me qytetarin. Propozimi që PD ka bërë për ndryshimin në kushtetutë nga pas ka arritjen e mundësisë ligjore që të garohet në koalicione, ku çdo anëtar të ketë listën e tij të kandidatëve. Me aq se e njoh unë problemin, diskutimin rreth këtij problemi, mundësitë që të arrihet në një rezultat të tillë është afër zeros.
Nuk e kuptoj se pse PD ndjek këtë rrugë, kur do të ishte po aq në plotësim të interesit të saj kur do të kërkonte ndryshim të sistemit, ose do të bënte ç’të ishte e mundur për të përfituar nga ndryshimet kushtetuese të Korrikut. Nuk ka pse që në mandatet që do të ketë nesër të përfitojë nga votat e të tjerëve.
Sa më shumë të zvogëlohet numri i rajoneve zgjedhore, aq më shumë rriten mundësitë për të fituar vende në Kuvend. PD kërkon një gjë të kundërt, unë do të veçoja dy probleme, që nuk kanë arritur të zgjidhen, vota e emigrantëve dhe depolitizimi i administratës zgjedhore”- ka thënë Kume.
Më tej ai tha se edhe ndryshimet në hartën territoriale kanë për qëllim përfitimin politik.
“PD lidhur me votën preferenciale mban atë qëndrim që ka pasur dhe mijë herët, që po, të bëjë ç’është e mundur për listat e hapura, e ka të shkruar dhe tani këtë, por e rëndësishme është si do të shkruhen dispozitat. Mua më lë mundësinë që vijohet me të njëjtën gjë, që ndryshimet në Kushtetutë bëhen vetëm për qëllime politike.
Edhe në hartën territoriale që do të bëhet nesër patjetër që do të ketë interesa politike, duhet të punohet për një hartë që të arrihet maksimumi i efikasitetit të shërbimit për qytetarët” – vijoi Kume gjatë fjalës së tij.
