Është shoqëruar me debate mbledhja e Komisionit të Shëndetësisë për shkak të mos mbajtjes së maskave gjatë zhvillimit të takimit.
Ministrja e Shëndetësisë, Ogerta Manastirliu, ishte e ftuar në dëgjesën e kësaj të hëne, për të raportuar ecurinë epidemiologjike në vend dhe masat që po ndërmerren në shkolla, universitete dhe konvikte.
Para se të niste fjalën, ministrja tha se nëse deputetët nuk vendosin maskat, i duhet ta mbajë ajo atë, për të mbrojtur shëndetin dhe respektuar protokollin.
“Para se të marr fjalën dua të bëj një kërkesë për mbajtjen e maskave. Për të mbrojtur shëndetin e atyre fëmijëve që ne përmendim, por edhe tonën. Duke respektuar kështu edhe protokollin”, tha ministrja.
Por, kjo kërkesë nuk është respektuar nga deputetja demokrate, Oriola Pampuri, e cila tha se nuk mund ta mbajë maskën për hipokrizi, në një kohë që studentët paraqiten pa maska në auditorë dhe linjat e autobusëve janë të tejmbushur me qytetarë.
“Refuzoj të mbaj maskën për hipokrizi. Duke qenë se në të njëjtën kohë linjat e autobusëve janë të tejmbushura dhe studentët në auditorë janë pa maska”, u shpreh Pampuri.
Me herët pati sërish debate në Komision, pasi ministrja e Arsimit Evis Kushi nuk u paraqit për dëgjesë.
