Banorët e zonës “5 Maji” në Tiranë vijojnë protestën kundër aksionit të IKMT për prishjen e banesave të tyre. Ata kanë nisur protestat që në orët e para të ditës dhe deklarojnë se nuk do të largohen derisa të marrin një zgjidhje. Banorët tregojnë për mediet se, nuk kanë firmosur asnjë marrëveshje me Bashkinë e Tiranës dhe i kanë ndërtuar shtëpitë shumë vite më parë.
Të revoltuar ata thonë se shteti nuk mund t’i dhunojë në pronat e tyre, ndërkohë që i kanë të legalizuara dhe kanë paguar çdo taksë në mënyre të rregullt. Ata shprehen të vendosur se nuk do lejojnë cenimin e pronave dhe se nuk pranojnë bonus qiraje, pasi nuk është i drejtë për rastin e tyre. “Këtu po na grabisin zonat, të gjithë duan të flenë rehat në shtëpitë e veta, asnjë nga ne nuk ka firmos në Bashkinë e Tiranës. E kam shtëpinë të legalizuar, vijnë te ne ndërkohë që këtu kanë magazinat bosh.
Me çfarë të drejtë? Pse shtëpitë nuk paskan çmim tregu, ne nuk kemi një marrëveshje zyrtare. Nuk vendos dot ai për shtëpitë tona me çmim reference, nuk jemi për bonus qiraje sepse kemi shtëpitë tona”, u shpreh një nga banorët.
Ndërkohë, një tjetër banor tha se dallon fare hapur që kjo gjithçka po bëhet në shkelje të ligjit, pasi në fund të lagjes së tyre ndodhet një fasoneri, që është në pronësi të Arben Ahmetajt, por ajo nuk është prekur dhe nuk do të prishte.
“Ne nuk jemi të pastrehë, i kemi ndërtuar vetë dhe kemi paguar çdo taksë në mënyrë të rregullt. Shteti po na bie në qafe, nuk kemi si të durojmë kur vijnë na rrahin në shtëpitë tona. Kemi bërë kërkesa dhe askush nga organet kompetente nuk ka sqaruar gjë. Zona jonë nuk është pjesë e rindërtimit, ne nuk kemi fatkeqësi natyrore. 12 faza me nga 40 shtëpi, janë rreth 400 familje që do mbeten rrugëve. Me kë e kanë bërë pazarin këta, a ka premtuar Bashkia ndonjë metër katror njësi për biznes? Pronat tona nuk keni për t’i gëzuar! Fasoneria e Arben Ahmetaj është në fund të rrugës, mbështesin IKMT, hajdutët e tyre.
Banorët e kësaj zone protestojnë prej disa ditësh, duke akuzuar qeverinë se po iu cenon të drejtën e pronës dhe po i vjell djersën e tyre. Ndërsa Bashki Tiranë, nga ana e saj nuk ka dhënë asnjë reagim dhe as nuk del të sqarojë qytetarët së si do të veprohet më tej.
