Prokuroria e Përgjithshme ka njoftuar ditën e sotme se, 10 persona po ndiqen penalisht me akuzën e “Krimeve Zgjedhore”, ndërkohë që 4 të tjerë janë arrestuar. Në njoftimin e bërë publik, evidentohet se prokuroritë në vend kanë regjistruar 82 denoncime për vepra penale në lidhje me zgjedhjet. Në këto kushte 10 persona po ndiqen penalisht për veprat penale të mësipërme dhe janë arrestuar në flagrancë 4 të tjerë.
Mësohet se, prokuroritë kanë marrë gjithsej 158 njoftime për vepra penale në fushën e zgjedhjeve prej të cilave, 91 drejtpërdrejt në prokurori. Nga këto të fundit 70 njoftime përbëjnë kallëzime të subjekteve politike, 3 njoftime janë nga qytetarë dhe 18 njoftime të institucioneve shtetërore. Sipas të dhënave të publikuara, deri më tani për 20 çështje me 2 persona nën hetime është vendosur vendim pushimi, ndërsa janë pezulluar 3 çështje të tjera. Prokuroria bën me dije se aktualisht janë në gjykim 4 çështje me 4 persona.
Ndërkohë janë në verifikim e sipër 13 njoftime për veprat penale në fushën e zgjedhjeve, ndërsa i janë transferuar SPAK 24 çështje dhe është vendosur mosfillimi i procedimit penal për 34 çështje.
