Në mbledhjen e sotme të Komisionit të Ligjeve u bë me dije se qytetarët, njësoj si me Rrugën e Kombit, do të paguajnë taksë për të kaluar në Rrugën e Arbrit. Sipas kontratës, qeveria do ta japë me koncesion dhe çdo qytetar do të paguajë 4 euro taksë për të kaluar nga Tirana në Dibër apo anasjelltas.
Deklarata shkaktoi debate në mbledhje, ku e pyetur rreth vërtetësisë së këtij lajmi, ministrja e Financave dhe e Ekonomisë, Delina Ibrahimaj refuzoi t’i përgjigjej pyetjes duke e injoruar.
Por si qëndron e vërtetë e Rrugës së Arbrit?
Vetëm disa ditë më parë , kryeministri Edi Rama deklaroi me pasion të madh datën zyrtare të hapjes së këtij aksi rrugor që pritet të lidhë Tiranën me Dibrën, për të cilën propagandonte lart e poshtë nëpër media apo fushata elektorale që do të ishte pa pagesë.
Nga foltorja e parlamentit, Rama tha se Rruga e Arbrit do të hapet më 29 nëntor, festën zyrtare të Çlirimit të vendit.
“Me mendjen tuaj Shqipëria mbeti aty ku ishte, por faktet flasin dhe në 29 Nëntor do të hapet rruga e Arbrit që të kalojnë njerëzit me të vetmin problem që në qafën e Murrizit për shkak të problemit gjeologjik të tunelit që ka krijuar vonesa të mirë dokumentuara, gjithë pjesa tjetër është gati”.
Por nuk është çudi nëse hapja e rrugës do të shtyhet sërish, pasi kjo nuk është hera e parë që Rama gënjen për përfundimin e punimeve. Më herët ishte deklaruar se rruga do të hapej brenda sezonit të verës që sapo mbaroi.
Rruga, jo vetëm që nuk u hap në verë, por sot u bë e ditur që do të jetë me pagesë, njësoj si ajo e Kombit. Vetë Rama në prill të këtij viti tha se rruga do të jeta pa pagesë dhe do të mirëmbahet nga kompania.
“Mendoj se kjo rrugë është një arsye shumë e fortë për të besuar fort te kompanitë shqiptare që tanimë kanë mbërritur në një nivel ndërkombëtar. Ne e nisëm në një proces të mbartur me negociata me kinezët, negociatat nuk përfunduan me sukses për shkak të kushteve që na u dukën të pafavorshme për interesin publik. Pastaj hymë në një proces tjetër. Gjithmonë me punët publike, sidomos në këto vepra inxhinierike me të papriturat e tyre ka gjithmonë vonesa. Gjatë gjithë kësaj kohe do të mirëmbahet nga kompania. Ne do të jemi në mbështetje financiare edhe për mirëmbajtje dhe njerëzit do ta kenë këtë rrugë pa pagesë”.
Edhe kur replikonte me ndjekësit në Facebook, Rama mburrej se qytetarët nuk duhet të paguajnë për të kaluar në të: “Kjo rrugë nuk do të ketë asnjë tarifë për sa kohë do të jem unë, pastaj me të tjerët shifni e bëni e do të më kujtoni”.
Historia e Rrugës së Arbit, nuk është e padëgjuar më parë, pasi e njëjta gjë ndodhi me Rrugën e Kombit, tarifa e së cilës është 5 euro për automjetet dhe 100 lekë me TVSH për banorët e qarkut.
Të njëjtin fat pritet të kenë edhe autostradat e tjera, si pshm ajo Milot-Fier që ishte parashikuar të nisë muaj më parë, dhe që është paralajmëruar paraprakisht që do të jetë me pagesë./ D.L/ Gijotina.com
Discussion about this post