Në mbledhjen e përbashkët të Komisionit të Ligjeve dhe Këshillit të Legjilacionit, përfaqësuesit e Partisë Demokratike prezantuan Vettingun e politikanë.
Nënkryetari i PD, Alfred Rushaj tha se ka ardhur koha që politikanët të trajtohen nga ligji njësoj si gjyqtarët, prokurorët dhe policët, të cilët kalojnë procesin e Vettingut për ligjshmërinë e pasurisë dhe kontakteve të papërshtatshme me krimin.
“Dekriminalizimi i plotë dhe zbatimi i të njëjtave norma të Vettingut për vlerësimin e lidhjeve me krimin e organizuar, dhe ligjshmërinë e pasurisë, duhet të zbatohet edhe ndaj zyrtarëve të lartë publikë, ku përfshihen deputetët, Kryeministri, ministrat, kryebashkiakët dhe drejtuesit e institucioneve kushtetuese. Kjo garanton parimin e barazisë përpara ligjit, dhe përbën një premisë për një qeverisje të pandikuar nga krimi i organizuar dhe korrupsioni, duke pastruar nga radhët e politikanëve dhe zyrtarëve të lartë, individë të lidhur me krimin e organizuar dhe të korruptuar,“ u shpreh Rushaj.
Për të treguar rëndësinë e Vettingut në politikë, kreu i grupit parlamentar të PD-së iu referua simbolit të luftës së shtetit ndaj mafias, Paolo Borsellino. “Ekziston një keqkuptim bazë sipas të cilit politikani që shoqërohet me mafiozë, nëse nuk dënohet nga gjykata, është i ndershëm! JO! Gjykata mund të bëjë vetëm vlerësime të natyrës gjyqësore. Është detyrë e institucioneve që të flakin politikanët e afërt me mafian, për të qenë të ndershme dhe për t’u shfaqur si të tilla”, ishin fjalët e Borsellinos të zgjedhura nga Rushaj si mesazh se Vettingu i politikanëve duhet pranuar nga PS.
Më herët Rushaj zhvilloi një takim me dyer të mbyllura me ambasadoren Yuri Kim dhe kreun e grupit parlamentar të PS, Taulant Balla.
Discussion about this post