Këshilli i Ministrave ka miratuar kriteret e reja për ushtrimin e profesionit të noterit. Ministri i Drejtësisë, Ulsi Manaj njoftoi se këtij projektligji, që sipas tij ka për qëllim forcimin e integritetit të noterit, do t’i nënshtrohen dhe ata që janë në funksion.
Ndryshimet në kritere për noterë kanë të bëjnë me përjashtimin nga sistemi të personave që kanë lidhje apo kontakte të papërshtatshme me krimin e organizuar ose me persona të dënuar për kryerjen e veprave penale të rënda.
Ky ndryshim në ligj, sipas ministri të Drejtësisë, vjen si përmbushje e detyrave të dhëna nga partnerët ndërkombëtarë. Ligji i ri përcakton të njëjtën procedurë dhe të njëjtën kritere për heqje licencë të njëjtat si për prokurorë dhe gjyqtarë. Ndryshimet e propozuara, sipas Manajt synojnë një Vetting të noterëve që janë në shërbim aktualisht.
Vettingu i noterëve do të ndalet në disa pika, ku përfshihet “Integriteti dhe besueshmëria profesionale”, tërësia e veprimeve, mosveprimeve ose sjelljeve që sigurojnë mungesën e dyshimit të arsyeshëm, të bazuar në indicie, të dhëna ose fakte të besueshme për mbajtjen e kontakteve të papërshtatshme të të interesuarit ose kandidatit për noter me persona të përfshirë në krimin e organizuar ose në kryerjen e veprave të rënda penale, si dhe mungesën e sjelljeve të rënda të papërshtatshme etike e morale që cenojnë besimin e publikut në sistemin noterial.
“Kontakt i papërshtatshëm” është shoqërimi ose mbajtja e lidhjeve nëpërmjet takimeve, komunikimit elektronik ose çfarëdolloj mënyre tjetër takimi të qëllimshëm me një person të përfshirë në krimin e organizuar ose në kryerjen e veprave të rënda penale, kur shoqërimi ose mbajtja e lidhjeve nuk kryhet për shkak të ushtrimit të detyrës.”.
Discussion about this post