Kryetari i Bashkisë së Tiranës, Erion Veliaj ka folur për protestën e banorëve tek “5 Maji”, duke thënë se mediat që e pasqyrojnë protestën dhe politikanëve që e mbështesin e bëjnë për interesa personale.
Ai është shprehur se mediat e trafikantëve të drogës dhe portale gjobvënëse nuk kanë asnjë shans që të shantazhojnë atë dhe Bashkinë e Tiranës.
“Për të gjitha ato media, qofshin media të trafikantëve të drogës apo media që vënë gjoba, apo portale që dihen se një postim e kanë sa një apartament, shanset që të shantazhoni Kryetarin e Bashkisë ose Bashkinë e Tiranës janë zero”- ka thënë Veliaj.
Më tej ai iu drejtua edhe politikanëve që i mbështesin banorët se edhe ata e kanë shansin zero të vënë gjoba, duke shtuar se do ta lenë edhe ata reputacionin aty, siç e kanë lënë ndër vite me betejat me Bashkinë e Tiranës.
“Mund të transmetojnë dhe të provokojnë histeri, të bëjnë sfida publike për ndeshje në “Bregun e Lumit”, por shanset për t’i vënë gjobë Kryetarit të Bashkisë apo Bashkisë së Tiranës janë zero. Do ta lenë edhe ata reputacionin aty, siç e kanë lënë ndër vite me betejat me Bashkinë e Tiranës, por institucioni i gjobës nuk do triumfojë mbi institucionin e të drejtës dhe solidaritetin që kemi me projekte të tilla. Pushka top, por siç thamë, projektet do shkojnë deri në fund, pallatet do shkojnë deri në fund.
Kush e ka të drejtë dhe i takon, do ta marrë. Kush është spekulant do humbasë karrierën politike dhe sigurisht, do damkoset si televizion apo portal që vë gjoba dhe kërkon apartamente në shkëmbim të sjelljes së mirë. Pushka top atyre, punë të mbarë dhe krahë të lehta skuadrës sonë” – nënvizoi Veliaj.
Protestat te “5 Maji” në Tiranë kanë nisur prej disa ditësh nga banorët të cilët janë kundër shembjes së shtëpive të tyre që preken nga procesi i rindërtimit për zhvillimin e zonës së re, siç përcaktohet në vendimin që Këshilli i Ministrave ka marrë më 22 shtator të këtij viti. Ata i kërkojnë autoriteteve që banesat e tyre të vlerësohen me çmimin e tregut dhe të kenë një kontratë të rregullt qiraje.
Banesat që duhet të shemben, ndodhen në hartën e projektit të Bashkisë së Tiranës si “zonë në zhvillim” dhe parashikohet ndërtimi i pallateve ku do të strehohen familjet që u është dëmtuar banesa nga tërmeti i vitit 2019.
Discussion about this post