Covid i mori jetën 3-vjeçares dje në Berat, 2 fëmijë të tjerë nisen me urgjencë drejt Tiranës
Vdekja e fëmijës 3-vjeçare me Covid, zbulohen detaje të reja rreth trajtimit mjekësor në Repartin e Pediatrisë së Beratit. Bëhet me dije se fëmija pësoi “komplikacion vaskular”, ndërsa dy fëmijë të tjerë me Covid-19,2 dhe 3 vjeç e gjysëm, janë transportuar sot drejt Tiranës.
Vdekja e fëmijës 3-vjeçare një ditë më parë në Spitalin Covid në Tiranë ka tronditur mbarë opinionin publik. Pas qëndrimit disa ditor në intubim, 3-vjeçarja Amaris Polovina gjeti vdekjen mëngjesin e djeshëm në Tiranë dhe trupi i saj i pajetë u transportua drejt qytetit të lindjes, Beratit.
Burime të brendshme të Repartit të Pediatrisë në Spitalin Rajonal Berat, bëjnë me dije se, 3-vjeçarja Polovina kishte mbërritur në këtë repart me temperaturë të lartë rreth orës 11:00 të ditës së Dielë.
Ajo është trajtuar nga mjeku pediatër Vanion Çinari me serume dhe antipiretikë, ka kryer analizat e gjakut si dhe i është nështruar edhe tamponit, që ka rezultuar “pozitiv”. Meqënëse ka rezultuar e prekur me Covid-19 dhe gjendja e saj nuk ishte e rënduar, mjeku e ka shtruar të miturën në Repartin e Infektivit të Pediatrisë. Vetëm disa orë më vonë, e mitura është rënduar në mënyrë të menjëhershme, duke shfaqur komplikacione në rrugët e frymëmarrjes. Sipas mjekëve të pediatrisë, mendohet se fëmija ka pësuar “komplikacion vaskular”.
Mjekët kanë konfirmuar se, në vetëm pak orë 3-vjeçarja ka pësuar precipitim të gjendjes shëndetësore, të tipit “aksident vaskular”.
Për këtë arsye mjekët e kanë transportuar të miturën me autoambulancë dhe të shoqëruar nga mjeku pediatër Çinari drejt Spitalit Covid në Tiranë, ku edhe gjeti vdekjen. Mësohet se të miturës i është kryer në Tiranë edhe autopsia mjeko-ligjore ,për të përcaktuar edhe shkaqet e vërteta të vdekjes.
Të njëjtat burime brenda Repartit të Pediatrisë Berat konfirmojnë se, vetëm ditën e sotme kanë rezultuar “pozitiv” me Covid-19 edhe 2 fëmijë të tjerë, të moshave 2 dhe 3 vjeç e gjysëm, të cilët janë transportuar drejt Tiranës.
Discussion about this post