“I forti” i Vlorës Myrteza Çaushi i njohur ndryshe si Zani i Vlorës, është rikthyer sërish me një kërkesë në Gjykatën e Korçës. Zani është duke vuajtur dënimin me burg të përjetshëm.
Në datën 2 nëntor 2021, ai ka kërkuar nga Gjykata, përllogaritjen e ditëve të qëndrimit në paraburgim.
I dënuari përjetë kërkon nga togat e zeza që të bëjë një llogaritje matematikore të ditëve, duke filluar nga data 1 shtator 1999 deri në ditën kur ai është dënuar me vendim të formës së prerë nga Gjykata e Apelit Tiranë.
Më datë 10 prill të këtij viti pas shumë kërkesash dhe përpjekjesh për tu liruar, Gjykata e Korçës vendosi ta lërë sërish në burg “të fortin e Vlorës”. Ishte ky vendimi i togave të zeza të cilët nuk kanë pranuar kërkesën për lirim të parakohshëm të ish-kreut të bandës së “Çoles”, me argumentin se ai nuk është rehabilituar ende dhe paraqet rrezik për shoqërinë nëse lirohet. Me këtë argument është bërë palë edhe Drejtoria e Burgjeve, teksa gjithashtu ka argumentuar se edhe përgjatë qëndrimit në qeli Çaushi nuk ka pasur sjellje shembullore, por është dënuar edhe disa herë të tjera gjatë vuajtjes së dënimit. Sakaq kujtojmë se Zani Çaushi ka bërë kërkesë edhe për ndryshimin e llojit të sigurisë së burgut dhe seanca pritet të mbahet më 14 prill. I forti i ‘97 qëndron prej vitesh në burgun e sigurisë së lartë në Drenovë të Korçës, ndërsa nga drejtësia shqiptare është dënuar me burgim të përjetshëm. Ky proces i zvarritur prej vitit të kaluar duket se nuk po gjen qetësi.
Dështimi i kërkesave të Zani Çaushit
Pas dështimit në muajin korrik 2020 për të marrë një lirim me kusht, Myrteza Çaushi ose siç njihet ndryshe si “Zani i Vlorës”, u rishfaq sërish në dyert e Gjykatës së Korçës më datë 29 shtator 2020 me qëllim, përllogaritjen e saktë të ditëve të vuajtjes së dënimit, duke filluar nga momenti i arrestimit fillestar e deri në këtë periudhë, ku Myrteza Çaushi, ndodhet në burgun e Drenovës. “Zani i Vlorës” është dënuar nga Gjykata e Lartë me burgim të përjetshëm, por ka kërkuar disa herë lirimin me kusht nga qelia, pasi sipas tij ka kryer ¾ e dënimit në burg. Madje, gjatë seancës në muajin korrik 2020, Zani Çaushi ka kërkuar që të hapet çështje penale sepse sipas tij i janë llogaritur saktë koha e dënimit të vuajtur. “…unë kam vuajtur më shumë se 31 vjet dhe jo 25 vjet siç e kanë paraqitur tek dinamika IEVP-së Korçë…”, deklaroi Myrteza Çaushi, para gjykatës gjatë debatit në muajin korrik. Për më tepër në debat e sipër, Çaushi mësohet t’i ketë kërkuar gjyqtarit, që të arrestonte të gjithë personat që i kishin vjedhur ditët e burgut.
Discussion about this post