Pashk Përvathin, ka çelur galerinë e tij me emrin, “Galeri plus”. Diçka që ai e ka menduar ekskluzivisht për publikun e kryeqytetit, krahas galerisë në qytetin e tij, Lezhën.
Ai u shpreh se donte të krijonte pavarësinë e tij si artist, dhe donte të kishte gjithashtu edhe një vend që mund të shërbente si pikë takimi me artdashësit e tjerë.
“’Galeri plus’ erdhi shumë natyrshëm dhe është një emër që më pëlqen. Sepse galeria e madhe dhe streha e madhe dhe origjinal ku mbahen pikturat e mia janë në Lezhë. Kjo është një shtojcë e asaj të Lezhës. Kisha kohë që po e mendoja të kisha një pikë takimi me artdashësit e kryeqytetit. Pandemia, mungesa e galerive në Tiranë që po mbyllen, unë mendova të krijoj pavarësinë time. Të kem një vend ekspozimi.” – thotë Pashk Përvathi.
Në ekspozitën e përhershme këtu vëmë re vetëm gjininë e peizazhit. Por krijimtarinë e tij ai jo rrallë ja ka kushtuar edhe portretit apo nudove. Gjithsesi, sipas tij, ky është një cikël që për të është mbyllur tashmë.
“Në këtë moment kam zgjedhur një cikël me peizazhe dhe katër natyra të qeta, por në raste të ndryshme kur bëj ekspozitat e mia mund të jenë edhe ekspozita me portrete.” – shprehet piktori.
Veprat e tij, ai ka arritur që t’i kryej duke bërë udhëtime nëpër vende të ndryshme të Shqipërisë dhe është ende në punim të disa pikturave të tjera, në vende që ai nuk i ka vizituar ende.
Discussion about this post