Qeveria bie në kontradiktë me veten sa i përket vendimeve në lidhje me masat anti-covid. Rasti më i fundit ka ndodhur ditën e sotme, ku nga Parlamenti ministrja Manastirliu ka deklaruar se, ashtu si në të gjitha vendet europiane edhe në Shqipëri do të vendoset ‘GreenPass’ për të hyrë në lokale dhe në strukturat e shërbimit.
Por këtë deklaratë e ka hedhur poshtë kreu i Urgjencës, Skënder Brataj. Sipas tij, deklaratat e ministres së Shëndetësisë, Ogerta Manastirliu, janë keqkuptuar.
Brataj tha se deri tani nuk është marrë asnjë vendim i tillë që duhet një Green Pass, pra pasaportë vaksinimi, për t’u futur në lokale. “Mënyra si veprohet në Europë është kjo, por këtu ende nuk është marrë asnjë vendim. Krahasimi është që në të gjitha vendet e tjera po bëhet. Monitorimi dhe analiza e situatës bëhet në çdo moment, por deri tani nuk është marrë asnjë vendim. Kemi vënë re se si shtet kemi ruajtur një linjë tonën, ku ka muaj të tërë ku nuk kanë ndryshuar masat. E rëndësishme është të respektohen ato që janë në fuqi. Deri tani asnjë vendim i tillë nuk ekziston,” tha Brataj.
Kjo nuk është hera e parë që qeveria ndryshon mendimet në lidhje me masat anti-covid, ose bie në kundërshtim me deklaratat e mjekëve. Gjithsesi, mbetet për t’u parë nëse do duhet “GreenPass” për të hyrë në lokale apo jo.
Discussion about this post