ProjektBuxheti i viti 2022 vijon të jetë fokusi i diskutimeve në mbledhjet e Komisioneve. Avokatja e Popullit, Erinda Ballanca ka qenë e pranishme sot në Komisionin e Ligjeve, ku kishte disa kërkesa për institucionin që ajo drejton, lidhur me zgjerimin e stafit apo pajisjen me mjete të reja.
Ballanca kërkoi që të zgjerojë stafin e saj me të paktën një person, që do të merrej me adresimin e çështjeve klimaterike dhe me mbrojtjen e gjeneratave të ardhshme.
“Unë kam shënuar numrin total të stafit të avokatit të popullit, që janë 56 persona, përfshirë stafet mbështetëse. Hera e fundit që Avokati i Popullit ka pasur një shtesë punonjësish në nivel teknik ka qenë në 2014. Kam bërë kërkesë në mënyrë të vazhdueshme rritjen e stafit, të paktën të kemi të shtuar një punonjës në nivel ndihmës komisioneri. AP është mbrojtës i të drejtave të njeriut. Shtimi i një njeriu që do të trajtojë mbrojten e të drejtave të njeriut, do të reflektohej dhe në progres raport, do të merrej me çështjen e ndryshimeve klimaterike, dhe mbrojtjen e gjeneratave të ardhshme”, tha avokatja.
Një tjetër kërkesë e avokates ishte pajisja me disa mjete të reja qarkullimi, pasi sipas saj, ato ekzistuese janë amortizuar dhe kërkojnë shumë para për mirëmbajtjen e tyre.
“Kërkesa e fundit është ajo për të përmirësuar punën e inspektimeve, mundësitë teknike nuk janë ato që duhet, lëvizim me automjete të viteve ’99 apo 2002. Shpenzojmë shumë të ardhurave për mirëmbajtjen e tyre, sesa në rast se do të blinim një mjet me parametra më të mira. Jemi munduar që shumë nga çështjet ti zgjidhim me donatorë, duke u munduar që të mos prekim shifrën që na vjen nga buxheti i shtetit”, tha Ballanca.
Ndër të tjera, avokatja e popullit shtoi se ajo është në përfundim të mandatit në krye të institucionit, dhe kjo ishte hera e fundit që ajo del përpara Komisionit të Ligjeve.
Discussion about this post