Kryeministri Edi Rama nuk i ndal batutat, ku shpesh me anë të tyre “thumbon” politikanët. Duket se një e tillë ka qenë dhe ajo e thënë në takimin me nxënësit dhe studentët në Kamëz.
Fillimisht Rama po u komunikonte atyre se gjuha shqipe është në rrezik për shkak të shkurtimeve që përdoren në rrjetet sociale. Sipas tij kjo situatë nuk është vetëm në Shqipëri, por ndodh edhe në vende të tjera të Evropës.
“Gjuha shqipe është në rrezik. Këto shkurtime në celular, pz (për zotin) kanë krijuar këtë situatë. Edhe në Francë gjuha është në rrezik. Në shumë vende të zhvilluara ka probleme me gjuhën në provimet e universitetin. Nuk është çështja se humbet drejtshkrimi”, tha ai.
Kjo është një tkurrje që i bëhet gjuhës, të cilën e pohon si tkurrje të trurit.
Ndër të tjera ai ka përmendur dhe profesione, të cilat sipas tij nuk e njohin gjuhën shqipe. Këtu përmend dhe personat që vrasin qen, duke thënë se ata nuk kanë bërë asnjë orë letërsi në jetë.
“Një mjek i mirë është një humanist që nuk ka njohuri për letërsinë. Është mirë që edhe jashtë orëve pavarësisht se do bëhesh mjeke, të vazhdosh të kesh vëmendje për letërsinë. Mjeku nuk është kasap që trajton organizma të gjallë që i përkasin botës së kafshëve. Dhe aty prapë duhet një nivel i caktuar humanizmi. Ata që vrasin qen në rrugë nuk kanë bërë asnjë orë letërsi në jetë. Dikush që ka bërë orë letërsie nuk vret qen në rrugë”, përfundoi kryeministri.
Duket qartë se Rama me anë të kësaj deklarate do t’i japë mesazh dikujt, i cili vret qentë. Nga denoncimet dhe informacionet e shpeshta, Bashkia Tiranë është ajo e cila ka dhënë urdhër për vrasjen e tyre. Pikërisht kryetar Erion Veliaj është akuzuar nga shoqatat e ndryshme dhe nga qytetarët për vrasjen e qenve të rrugës, pavarësisht se ka në buxhet të veçantë për trajtimin e tyre.
Mos ndoshta Rama ka “thumbuar” Veliajn me anë të kësaj deklarate, kjo gjë nuk dihet, por personi në fjalë e mori mesazhin e tij.
Discussion about this post