Gazeta greke “Ethnos” ka publikuar sot një reportazh të gjatë ku flet mbi emigrantët që përmes Shqipërisë tentojnë të hyjnë në Europë. Në reportazh thuhet se, shumë pranë kufirit me vendin tonë me dhjetëra emigrantë tentojnë të hyjnë çdo ditë në territorin tonë për të shkuar drejt Europës, por kthehen sërish nga efektivët e FRONTEX, agjencisë europiane të kufijve që prej kohësh është instaluar në zonat kufitare me Greqinë.
Ndër të tjera, bëhet me dije se në një hapësirë vetëm 300 metra larg pikës doganore të Kapshticës, klandestinët kanë ngritur çadrat, ku qëndrojnë derisa të munden të hyjnë drejt fshatit Trestenik të Devollit.
Në disa raste ata rrinë në ish-postat ushtarake të para viteve ‘90, ku dallohen edhe shenjat e qëndrimit të tyre. Ata që arrijnë të mbërrijnë në fshatin Trestenik furnizohen me ushqime dhe vazhdojnë linjën e tyre të udhëtimit, ndërsa pjesa më e madhe ndalohen nga policia kufitare dhe ekspertët e FRONTEX.
Sipas të dhënave të publikuara në këtë reportazh, të gjithë kanë ardhur nga vende si Siria, Afganistani dhe duke përshkuar Turqinë kalojnë në Greqi. Pasi hyjnë në Shqipëri ata përcillen nga trafikantët drejt Kosovës dhe më tej Serbisë, për t’u zhvendosur më tej drejt Hungarisë dhe Rumanisë, aty ku janë edhe pikat shpërndarëse drejt vendeve të Europës.
Ndërsa bëhet me dije se, vetëm pak kohë më patë në Rumani Europoli zhvilloi një aksion orët e fundit ku shkatërroi një rrjet kriminal që organizonte trafikun e paligjshëm njerëzor.
Discussion about this post