Deputetja dhe Kryetarja e Lidhjes Demokratike të Gruas, Albana Vokshi ka reaguar në lidhje me hapjen e garës. Kryetari i PD-së Lulzim Basha ka njoftuar kryetaren aktuale se do të mbahen zgjedhjet. Sipas saj ky është një vendim arbitrar, uzurpues dhe qesharak i bërë me një telefonatë.
Në një postim të bërë në rrjetin e saj “Facebook”, Vokshi ka komentuar vendimin e Lulzim Bashës. Në shkrim thuhet se ky është një dhunim arrogant i punës së strukurave dhe anëtareve të LDG.
“Zgjedhjet në LDG organizohen nga vetë forumi, sipas përcaktimeve statutore. As kryetari i PD-së, dhe asnjë komision zgjedhor i ngritur prej tij nuk mund të kenë rol në vendim-marrjen dhe menaxhimin e procesit. Drejtimi dhe vendim-marrja e forumit janë krejtësisht të shkëputura nga ato të Partisë. Asnjë drejtues i PD-së nuk ka rol në vendim-marrjen e LDG-së”, shkruan Vokshi.
Vendimi i Bashës konsiderohet si një tentativë për të vënë nën kontroll edhe forumin e gruas.
“Veprimi i tij është braktisje e rëndë e anëtarësisë dhe e grave demokrate. Zoti Basha fatkeqësisht tani nuk i takon, nuk i pyet, nuk u merr mendim demokrateve e demokratëve për asgjë.
Ky diktat është braktisje e anëtarësisë dhe e grave demokrate. Udhëheqja e Partisë duhet të flasë e bashkëpunojë me demokratët kudo ku ata janë, e jo vetëm me socialistët në Kuvend”, thuhet ndër të tjera në postim.
Discussion about this post