Shtatë kongresmenë amerikanë i kanë dërguar një letër presidentit të SHBA-së Joe Biden, ku në qendër të vëmendjes janë kritikat ndaj Vuçiç. Qëllimi kryesor i letrës është që SHBA të vendosë sanksione ndaj atyre që destabilizojnë Ballkanin Perëndimor. Këtu ata kanë theksuar sjelljen e presidentit të Serbisë në kohët e fundit.
Sipas tyre, Vuçiç ka rritur korrupsionin dhe presionin ndaj medieve. “Gjatë vizitës suaj në Beograd në vitin 2016, ju folët për një të ardhme shpresëdhënëse për Serbinë dhe popullin serb. Për fat të keq, për të arritur në atë të ardhme më optimiste, ne besojmë se veprimet e mëtejshme diplomatike nga SHBA dhe nga aleatët dhe partnerët tanë evropianë në veçanti janë vendimtare për t’u siguruar që Serbia mund të jetë efektive në zbatimin e reformave demokratike, duke bërë këtë, ata do të jenë në gjendje të përmirësojnë marrëdhëniet me të gjitha shtetet e Ballkanit Perëndimor, përfshirë Kosovën”, thuhet në letër.
Sipas tyre, kjo pikë duhet parë me prioritete nga presidenca amerikane, pasi liria e medias e rëndësishme për politikën e jashtme të Uashingtonit dhe për luftën kundër autoritarizmit në mbarë botën. “Fatkeqësisht, liria e medias në Serbi ka arritur një nivel të ulët. Siç vërejnë Reporterët pa Kufij: “Serbia është një vend ku gazetarët janë të ekspozuar ndaj sulmeve pothuajse të përditshme që vijnë gjithnjë e më shumë nga elita në pushtet dhe media proqeveritare. Është gjithashtu e qartë se mediat pro-qeveritare po bëjnë përparim dhe janë në një marrëdhënie reciproke të dobishme me qeverinë”, thonë kongresistët amerikanë.
Ndër të tjera, përmes kësaj letre ata i bëjnë thirrje Biden që të shqyrtohet përdorimi i Urdhrit Ekzekutiv 14033, për të bllokuar pronat dhe për të ndaluar hyrjen në Shtetet e Bashkuara të njerëzve që kontribuojnë në destabilizimin e situatës në Ballkanin Perëndimor. Dokumenti është i nënshkruar nga kongresistët Raja Krishnamoorthi, Ritchie Torres, David N. Cicilline, Jan Schakoësky, James P. McGovern, Mike Quigley dhe Jim Costa.
Discussion about this post