Deputeti Saimir Korreshi ka ironizuar akademinë e barinjve. I njohur për deklaratat e tij në Kuvend, Korreshi nuk ka lënë t’i ikë as kjo temë e cila ka pushtuar rrjetet sociale.
Sipas tij, problemi i vetëm është se ministrja nuk e ka vendosur se kush do të merret me dele dhe kush me dhi.
“Gjatë javës sa kaluar kjo qeveri miratoi një ligj dhe na promovoi një akademi. Vetëm se nuk na e specifikoi kush do të merret me dele dhe kush do të merret me dhi”, tha demokrati.
Më tej ai ka folur dhe për ligjin e bashkëqeverisjes të cilin e krahason me një papuçe leshi. Ky ligj synon vendosjen e pushtetit vendor nën pushtetin e ekzekutiv.
“Siç jam shprehur edhe më herët në Komisionin e Ligjeve, ligji i bashkëqeverisjes realisht është si një papuçe leshi e veshur ne behar. Sepse ajo rri ngushtë me normat Kushtetuese. Ligji krijon problematika mbi disa parime kushtetuese. Përkatësisht, parimin e ndarjes së pushteteve, autonomisë vendore, parimin e ndarjes së pushteteve duke kuptuar jo vetëm në një vijë vertikale nëpërmjet tre pushteteve por edhe në vijë horizontale përmes pushtetit qendror dhe vendor.
Në parim lidhet ngushtësisht parimi i decentralizimit dhe i autonomisë vendore që garanton hapësirën e nevojshme për organet e pushtetit vendor për të ushtruar kompetencën e tyre në pavarësi nga qëndroi. Por ky ligj synon praktikisht vendosjen e tyre nën kontrollin e pushtetit ekzekutiv….Kjo çorape leshi është edhe e grisur. Sepse kjo agjenci ka që nga viti 2017 që ekziston. Rezultatet: 183 mijë ankesa dhe 1800 zgjidhje, pra një dështim total. Pra ka bërë një vrimë në ujë dhe tregon sesa e dështuar është kjo qeveri në dhënien e shërbimeve të qytetarëve shqiptarë” shtoi deputeti.
Bujqësia është në një udhëkryq të madh, pa asnjë mbështetje nga shteti. Demokrati i tregon qeverisë se ka dështuar në këtë fushë, ndaj nuk duhet të trumbetojnë sikur po japin shumë para.
“Në buxhetin e shtetit keni 26 milionë euro për bujqësinë, kjo nuk del as për të arnuar plasmasët e serave, jo më për t’i ndërruar ato çdo tre vjet. Ndaj mos e trumbetoni sikur po jepni gjithë këto lekë për bujqësinë. Me programet tuaja keni dështuar ne këtë sektor”, përfundoi ai.
Discussion about this post