Ish-kryeministri Sali Berisha i është përgjigjur pyetjes së gazetarëve nëse do të ketë një parti të re opozitare, pasi kreut demokrat Lulzim Basha refuzoi dorëheqjen dhe largimin nga selia blu. Në një konferencë për mediat, Berisha tha se nuk do të ketë parti të re opozitare, dhe se PD është opozita e vërtetë.
“Nuk do ketë parti të re, kjo është PD, opozita e vërtetë. Nuk mund të marrë peng pluralizmin një njeri që paraqet standardet më të veçanta në historinë politike të Shqipërisë. Nuk mohohet se ish-kreu i PD, kishte vetëm një objektiv: karrigen, biznesin dhe pazaret e tij me Edi Ramën. Kjo u faktua, por kjo kohë ka marrë fund. Ne i qëndrojmë qëndrimit se me Edi Ramën nuk ka zgjedhje të lira, por do bëjmë gjithçka për të siguruar zgjedhje të lira,” tha Berisha.
Më herët, Berisha u ka bërë thirrje të gjithë deputetëve të Partisë Demokratike, të cilët kërkuan dorëheqjen e Lulzim Bashës, pas rezultatit tronditës në zgjedhjet e 6 marsit, që t’i bashkohen asaj, që ai e quan opozita e vërtetë.
Discussion about this post