President i Francës, Emmanuel Macron, ka shtyrë me disa orë vizitën e tij në Tiranë, ku nesër do të mbahet Samiti i Procesit të Berlinit, i pari që organizohet jashtë kufinjve të BE-së.
E ndërsa pritej që Macron të mbërrinte në Shqipëri mëngjesin e së hënës, për tiu bashkuar më pas punimeve të Samitit, mediat franceze njoftojnë se ai do të jetë në Tiranë, në orët e mbrëmjes.
“Emmanuel Macron do të shtyjë mbërritjen e tij në Tiranë, pas sulmit terrorist në Arras ku mbeti i vrarë një mësues dhe nga situata në Lindjen e Mesme, njofton Elysee.
Samiti i Procesit të Berlinit mbledh së bashku liderët e Ballkanit Perëndimor dhe disa vendeve evropiane për të promovuar dialogun politik, bashkëpunimin dhe pajtimin në rajon, si dhe afrimit me Bashkimin Evropian.
Në kontekstin kombëtar dhe ndërkombëtar, Macron do të mbërrijë në kryeqytetin shqiptar vetëm të hënën vonë pasdite, për pjesën dypalëshe të vizitës së tij që do të zgjasë deri të martën, sqaroi presidenca franceze.
Ai do të përfaqësohet në samitin ballkanik nga Sekretarja e Shtetit për Evropën, Laurence Boone. Elysee ende nuk e ka specifikuar programin e tij në Francë përpara se të fluturojë për në Shqipëri.
Më herët ishte njoftuar pjesëmarrja e Macron në Samit, në krah të kancelarit gjerman dhe Kryeministrave dhe Presidentëve, vendet e të cilëve janë pjesë e Procesit të Berlinit.
Pas sulmit me thikë, ku mbeti i vrarë një mësues dhe u plagosën dy të tjerë, por edhe alarmit për rrezikun nga sulmet terroriste, Kryeministri francez ka shpallur gjendjen më të lartë të alarmit.
Gjithashtu në Francë u ndaluan mitingjet pro Palestinës, pas kundërpërgjigjes së Izraelit ndaj sulmit terrorist të Hamasit kundër popullsisë civile izraelite.
Discussion about this post