Në intervistë me Alba Alishanin në A2 CNN pas humbjes së zgjedhjeve lokale, Belind Këlliçi foli dhe në lidhje me pretendimet se një ndër penalizimet e demokratëve gjatë këtij procesi zgjedhor ishte dhe koalicioni me Ilir Metën.
Kandidati demokrat pranoi se shumë demokratë patën pakënaqësi që koalicioni udhëhiqej nga Ilir Meta, por sipas tij kjo gjë u urdhërua nga Edi Rama. Ai shtoi se këtë e tregojnë dhe shifrat, ku vihet re se ka marrë më shumë vota se të gjitha partitë e opozitës së bashku.
“Unë nuk kam ndjerë ndonjë peshë nga ana e tyre përsa i përket vendimmarrjes së fushatës sime elektorale. Gjithë kohës kam pasur bashkëpunimin e tyre, kam pasur kohezion. Kam qenë i lirë të bëj fushatën time. Hapësira në hapjen e fushatës mu dha mua, po ashtu dhe në mbyllje. Gjykoj që çështja e koalicionit ka pasur një kosto të madhe që për herë të parë pamë që KQZ caktoi dhe kreu e koalicionit opozitar që ishte Meta.
Që në fakt ai e pranonte vetë që nuk ishte ai. E kishte çuar me shkresë që lider ishte Berisha. Kjo nuk i pëlqeu Ramës dhe i dha urdhër KAS që lideri i koalicionit ishte Meta dhe kjo gjë shkaktoi një pakënaqësi te demokratët. Ka pasur një problematikë sepse dhe diferenca mes kandidatit dhe koalicionit tregon për një handikap shumë të madh. Kam marrë 11 mijë vota më shumë se gjithë partitë opozitare së bashku. Ta garantoj që kam marrë dhe vota të majta, mora vota të të rinjve dhe vota gri me fushatën time pozitive”, u shpreh Këlliçi.
Discussion about this post