I pyetur lidhur me protestën e ish-kryeministrit Sali Berisha, sekretari i Përgjithshëm i PD-së, Gazmend Bardhi kërkoi që mediat të pasqyrojnë realitetit dhe të mos keqinformojnë, teksa nga ana tjetër iu kërkoi demokratëve të mos shfokusohen nga beteja e vetme që ato kanë, ajo ndaj kryeministrit Rama.
“Mediat duhet të jenë të vërteta, duhet ta pasqyrojnë protestën ashtu sikurse do jetë dhe jo të keqinformojë, sikurse mund të bëjnë shumë media këtu. Demokratët të mos shfokusohen nga beteja e vetme që kanë, me Edi Ramën, pasi rrëmuja nuk i ndihmon ata”, tha Bardhi.
Ndonëse pa ia përmendur emrin, Bardhi u shpreh duke shigjetuar Berishën, se askush nuk mund të përçajë demokratët duke përdorur metoda të vjetra, që janë lënë pas prej vitesh.
“Në rastin konkret, kushdo që përhapë metoda të vjetra përçarjeje mes demokratëve, e ka gabim, pasi këto i kemi lënë pas këtu e 35 vjet më parë. Kushdo që e bën këtë gjë, e bën vetëm për interesat e tij personale”, deklaroi Bardhi.
Lidhur me vizitën e Vuçiç në Tiranë, sekretari i përgjithshëm i PD-së tha se është kundër, por nuk mund të sillet si polic apo doganier duke mos lejuar zyrtarë të shtetit të futen në Shqipëri, teksa shtoi se rëndësi ka mbrojtja kombëtare e Kosovës.
“Jam kundër vizitës së Vuçiç, por nuk jam as polic trafiku dhe as doganier që të lejoj ose jo një zyrtar të lartë të një shteti tjetër të hyjë ose jo në Shqipëri. Rëndësi ka mbrojtja e çështjes kombëtare, mbrojtja e Kosovës dhe interesave të të gjithë shqiptarëve kudo që jetojnë.”, u shpreh për këtë çështje Bardhi.
Ish-kryedemokrati Sali Berisha ka paralajmëruar një protestë ditën e sotme, në orën 16:00, në kundërshtim të nismës “Open Balkan”.
Discussion about this post