Kryetari i partisë së Lirisë, Ilir Meta, ka reaguar sot në lidhje me lajmet e publikuar nga një gazetë austriake, e cila shkruan se ish-Presidenti ka lobuar në SHBA në lidhje me çështjen e hapur ndaj tij. Në një intervistë për Euronews.al, Meta tha se kostot e gjyqit ishin shumë të larta, 300 euro për një orë për studio ligjore, ndërsa dëmshpërblimi që mund të merrte nga gazeta, do ishte shumë i ulët. Sipas Metës, gazeta austriake njihet për skandale të tilla, ndaj vendosi që të mos e ndjekë çështjen ligjore. Ndërkohë për Halit Valterin i cili depozitoi një kallëzim në SPAK për çështjen e lobimit, Meta tha se ai ka udhëtuar shumë shpesh drejt Vienës, çka lë të nënkuptohet se i gjithë artikulli mund të ishte një stisje.
“Mund t’ju them se kjo gjë mu vlerësua e panevojshme dhe jo produktive nga disa kompani që merren me shpifje. Padyshim që gjyqi ishte i fituar. Për shkak të ligjeve austriake, kompensimi do ishte i përmasave modeste ndërkohë që shpenzimet për ndjekien e këtij gjyqi ishin të larta dhe për efekt për transparencën, nuk ia vlente. 300 euro ora për një studio ligjore. Ishte një gjë e panevojshme, gazeta vetëm ka prodhuar shpifje. Këto padyshim që vijnë për shkak se të kërkuarit janë në Vienë. Ai që ka bërë kallëzimin, herë pas here ka qenë në Vienë. Nuk kemi ndërmend të harxhojmë energji të kota me regjimin e inceneratorëve”, u shpreh ai. Ndërsa ka thënë me tutje se, gazeta në fjalë njihet si media që prodhon skandale.
Discussion about this post