Kosova nuk ka marrë ende asnjë dritë jeshile sa i përket liberalizimit të vizave. Zëvendëskryeministrja dhe ministrja e Jashtme, Donika Gërvalla, ka thënë se askush nuk e di datën e saktë se kur do të liberalizohen vizat për qytetarët e Kosovës.
“Sot askush, as institucionet tona e as unë si ministre e Jashtme, por edhe asnjë përfaqësues i BE-së, nuk mund ta thonë datën e saktë se kur mund të ketë lëvizje të lirë. Sot askush nuk e di kur do të jetë hapi final dhe kur do të largohen vizat për qytetarët e Kosovës”, ka thënë ajo në T7. Ajo deklaroi se s’mund të konfirmojë që liberalizmi i vizave mund të bëhet realitet për kosovarët në shtator, siç po jepen paralajmërime së fundmi.
Kryediplomatja kosovare ka folur edhe për deklaratat e presidentit serb, Aleksandar Vuçiç, i cili paralajmëronte liberalizim vizash për Kosovën më 23 qershor. “Çdo gjë që thotë Vuçiç në raport me Kosovën, nga opinioni, duhet marrë me shumë rezerva dhe prandaj ka ndodhur ajo që është pritur. Detyrë e institucioneve të Kosovës është të punojnë për çdo ditë që liberalizimi i vizave, me aq sa është brenda mundësive tona, të realizohet sa më shpejt. Detyrë e institucioneve nuk është të merren me thashetheme, por të merren me punët. Kemi biseduar me shumë shtete, kemi punuar në hapa të vegjël dhe të mëdhenj me shtete që kanë shtete skeptike”, tha ajo.
Discussion about this post