Ilir Meta, kreu i Partisë së Lirisë, tha se nuk ka asnjë lloj frike nga hetimet e SPAK lidhur me lobingun që ka bërë LSI në Shtetet e Bashkuara në Amerikës.
Meta tha se SPAK mund të çojë letra edhe në hënë, por duhet të ketë të qartë se Ilir Meta dhe LSI kanë zbatuar jo vetëm ligjet në Shqipëri, por edhe në SHBA.
“Kemi zbatuar ligjet, le të çojnë letër porosi jo vetëm në SHBA dhe të marrin përgjigjet, por edhe në hënë po të duan.
E gjithë kjo zhurmë që po bëhet synon të tërheqë vëmendjen nga problemi real: pagesat që vijojnë ti bëhen pronarëve të inceneratorëve, edhe pse nuk ka incenerator.
Duhet ti shkohet deri në fund kësaj afere, sepse po u bëhet një dëm i jashtëzakonshëm jo vetëm financave të shqiptarëve, por edhe shëndetit të tyre”, tha Meta.
Ai tha se mbështet reagimet e qytetarëve dhe protestat për ti thënë ndal kësaj afere.
“Duhet të përdorim çdo formë që reagimi qytetar të jetë i efektshëm, megjithëse nuk besoj se protestat do të japin efektin maksimal, pasi jemi në një përgjymje shoqërore, që nuk ka ndodhur sot, por ka nisur prej të paktën 10 vitesh.
Sot kemi arritur në çmontimin e shtetit, pasi kemi një person, Edi Ramën, që kontrollon gjithçka. Sigurisht që këtu kemi një gabim të madh nga opozita që i la fushën, i dorëzoi shtetin dhe çdo mekanizëm kontrollues dhe që garantonte balancën mes pushteteve. Ai që e bëri këtë e bëri me ndërgjegje të plotë, pastaj pati edhe të tjerë që i pëlqeu kjo skemë”, tha Meta.
Sipas tij, përballë opozitës kemi një narko-regjim, që tregohet edhe me miratimin e legalizimit të kanabisit, që tregon se kemi një kapje nga krimi i organizuar.
Discussion about this post