Avokati Genc Gjokutaj ka shpjeguar nga pikëpamja ligjore, se cilat janë pasojat për kryetarit e bashkisë së Kukësit, Safet Gjicit, pas shpërthimit të skandalit skandal dhe deri ku shtrihen ato.
Në studion e Syri Tv, Gjokutaj thekson se ajo nuk quhet më zyrë e shtetit, ajo zyrë është kthyer në një shtëpi publike. “Ky rast është i turpshëm, është një akt korruptiv moral i personit që e ka kryer. Unë e kam ndjekur nëpërmjet rrjeteve sociale. Është një nga aktet më të rënda që ka ndodhur kohët e fundit dhe të shohim se ç’do të ndodhë. Ne dimë vetëm atë akt të turpshëm në zyrë, në zyrën e pushtetit lokal, i saporizgjedhur në një nga rrethet e Shqipërisë siç është Kukësi, i cili për më tepër shquhet për traditat e tij morale, për familjen, për një opinion të shëndoshë shoqëror”, tha avokati.
Lidhur me mundësinë e arrestimit të Gjicit, pas hetimeve të nisura nga SPAK, Gjokutaj shprehet se nuk janë kushtet dhe kriteret që ai mund të arrestohet.
“Arrestimi lidhet gjithmonë me rrezikshmërinë shoqërore të personit dhe të veprës. Mendoj se nuk janë kushtet dhe kriteret për arrest. Ai është larguar menjëherë nga detyra. Do të merret në përgjegjësi penale”, shprehet ai.
Dorëheqjen e Gjicit nga posti i Kryebashkiakut, Gjokutaj e konsideron si të detyruar, jo nga vetë ai, sepse ai nuk e ka atë nivel moral që të japë dorëheqjen.
“Duhet të jetë e urdhëruar, por gjithsesi ky është një akt i turpshëm që dënohet jo vetëm moralisht nga një opinion i tërë publik, por edhe nga ligji.
Ajo që është e rëndë është edhe cënimi i besimit të publikut ndaj zyrave të shtetit, posaçërisht ndaj kryetarit të bashkisë, i cili është zyrtari më i lartë por edhe më i afërt i halleve, i problemeve të njerëzve, përditë.
Imagjinoni, në zyrën e këtij kryetari të shkojnë vajza apo gra për probleme të ndryshme që mund të kenë dhe në ç’zyrë shkojnë e me kë përballen dhe çfarë rriskojnë”, tha ai.
Lidhur me hetimet nga SPAK, Gjokutaj shprehet se nëse vajza do të jetë punonjëse e bashkisë, Safet Gjici do të përgjigjet për veprën penale të parashikuar nga Neni 105 “Shfrytëzimi i postit për të kryer marrëdhënie seksuale apo homoseksuale”, thotë ligji.
“Por, paraprakisht nga ç’kam dëgjuar në këto rrjetet sociale dhe nga një interesim sipërfaqësor me të njohur, më thonë që kjo kjo vajzë nuk është as nga Kukësi dhe nuk është punonjëse e bashkisë.
Kështu, ka shumë mundësi, nëse janë këto kushte dhe këto cilësi të kësaj shtetaseje, atëherë do të përgjigjet për dispozitën e Nenit 248 “Shpërdorimi i detyrës për përfitime seksuale”, por sigurisht që gjithmonë duhet që kjo marrëdhënie të kryhet kundrejt një përfitimi të ndërsjellë. Nuk e dimë cila është fabula e kësaj ngjarjeje por të presim të shikojë çfarë do të dalë nga hetimi i çështjes.”, tha ai.
Discussion about this post