Eksperti i sigurisë Ilir Kulla, dhe ai i kriminalistikës, Ervin Karamuço, kanë analizuar situatën në Kosovë, veçanërisht veriun e saj.
Në emisionin Zonë e Lirë, Kulla tha se Rajoni nuk rrezikohet nga një luftë e re, por tensionet do jenë të vazhdueshme. Sipas tij, serbët e kanë bërë njëherë luftën dhe e kanë humbur atë.
“Lufta është bërë njëherë. Është bërë në Kroaci, është bërë në Kosovë dhe dihet kush e ka humbur luftën. Që të ndodh ajo luftë, duhet të ketë rusë, Rusisë nuk ka, këtu ka serbë, serbët me lidershipin e tyre duhet të vendosin, sepse kisha e tyre është me kishën ruse, kurse serbët si shtet do duhet të vendosin: do rrinë këtej, apo andej. E kanë bërë njëherë një luftë dhe kanë humbur. Nuk do ketë luftë”, tha ai.
Kulla u shp[reh se trazira rajonale do ketë, por luftë frontale nuk do ketë. “Trazira rajonale janë si këto, në Bosnjë, Mal të Zi, në veri të Kosovës, por nuk mund të ketë sepse këto vende që janë në kufi me Serbisë janë vende anëtare të NATO-së”, tha ai.
Ndërkohë, Karamuço tha se ka pasur lajme dhe informacione se forca terroriste serbe do organizonin sulme në shtetin e Kosovës. Ai shtoi se para një ore është kapur një makinë me arsenal armësh.
“Disa prej forcave terroriste në veri të Kosovës, në kuadër të ditës kombëtare të Serbisë, ka lajme se do organizojnë sulme në Kosovë. Sot para një ore, është kapur në veri të Kosovës një makinë me arsenal armatimi, disa prej atyre armatimeve janë prodhime ruse, por përveç armatimeve ka eksplozivë dhe ka uniforma. Këta po organizohen për akte terroriste për përplasje. Do ketë përplasje me akte terroriste. Jo vetëm në Mitrovicë, por edhe në qytetet e tjera të Kosovës. Është paralajmëruar para katër muajsh qeveria e Kosovës”, tha Karamuço.
Discussion about this post