Shtensionimi i situatës në veri, zgjedhjet e reja atje dhe hartimi i draft-statutit të Asociacionit nga ana e institucioneve të Kosovës po shihen si prioritet nga i pari i Lidhjes Demokratike të Kosovës, Lumir Abdixhiku.
Ky i fundit pas takimit të sotëm me pjesëtarë të shoqërisë civile dhe OJQ-ve, i cili zgjati pothuajse 3 orë, theksoi se zgjedhjet e reja në komunat veriore duhet të shkaktohen me marrëveshje politike të partive që ishin pjesëmarrëse në zgjedhje.
“Gjendja e tanishme kërkon shtensionim në veri me qëllim të kthimit të legjitimitetit në komunat veriore. Zgjedhjet e reja duhet të organizohen, për mendimin tonë, me marrëveshje politike të pjesëmarrësve në zgjedhje, marrëveshje mes LVV e PDK-së dhe katër kryetarëve atje, për dorëheqje të tyre dhe shkaktim të zgjedhjeve brenda periudhës 45 vjeçare”, tha para medieve Abdixhiku.
Përgjatë takimit, ai, ka shpalosur shtatë pika të LDK-së, si vizion për gjendjen politike e ekonomike të vendit.
“Periudha 45 ditore do të shërbejë për institucionet e Kosovës, në veçanti komunitetin ndërkombëtar, për bindjen e serbëve për pjesëmarrje në zgjedhje. Mendojmë që pozicioni i Kosovës ndërkombëtarisht është i dëmtuar jo veç për shkak të politikave të gabuara, përplasjeve e veprimeve të paprecedenta të kryeministrit Kurti me aleatët tonë, por edhe për shkak të Ministrisë së Punëve të jashtme”, është shprehur kreu i LDK-së.
Ndër të tjera, ai, ka përmendur vizionin e tyre për diplomaci, ku ka propozuar emërimin e diplomatëve në çdo kryeqendër botërore, e që sipas subjektit politik që ai e drejton, kësisoj jo veç që do të hiqen masat ndaj Kosovës, por edhe do të parashtrohen hapat e mëtutjeshëm të bashkëpunimit.
Abdixhiku po ashtu ka bërë të ditur se LDK ka propozuar që Kosova ta marrë autorësinë e draft-statutit për Asociacionin e Komunave me Shumicë Serbe.
“Ne sot prezantuam idenë që Kosova të ndërtojë një ekip profesionistësh kushtetues, të së drejtës juridike, arsimit, kulturës, e të zhvillimeve ekonomike për të ndërtuar draft statusin e Asociacionit të komunave me shumicë serbe. Një draft statut i ndërtuar prej njerëzve më të mirë të vendit, e në autorësi të Kosovës dhe në plotni me Kushtetutën e Kosovës, karakterin unitar dhe rendin sovran të institucioneve të Kosovës”, ka thënë ai.
Abdixhiku ka bërë të ditur se LDK synon që takimet e radhës t’i zhvillojë me komunitetin akademik dhe stafin privat./RTK
Discussion about this post