Është ndarë nga jeta skulptori i njohur Agim Rada, në moshën 70-vjeccare. Mësohet se Rada ka qenë i shtruar prej dy ditësh në spital, për shkak të një problemi me mushkëritë.
Lajmi për ndarjen e tij nga jeta është dhënë nga miku i tij Përparim Kabo, i cili shkruan:
Lamtumirë Agim Rada!
Ma këpute shpirtin vëlla, sa herë që bisedonim mendoja se isha në një tempull ku paqja fliste me artin, arsyeja gjente binjakun dhe dinjiteti ishte mirë me veten….Më the që jam pa qejf, por nuk the që do të iki…Na mbeti statuja e Fishtës pa e vendosur në qendër të Tiranës…
Ti rebel i bukur dhe ti shpirt i bukur rebel. Sa krenar e bëje shqiptarin…E fundit vepër jotja ishte busti i Mehdi Frashërit, një nga mëndjet më të bukura të kombit…Si më the herën e fundit…Të lutem më merr edhe mua një herë në Permet…
Artist si ty Agim Rada Shqipëria i ka te rrallë sepse arti yt ishte pathos, etos dhe logos….Për kurajo askush nuk ta kalonte, as per shikimlarg, por ja që zemra jote e bukur heshti….dhe Skënderbeu që kishe në dorë vajton sot! Ah ato duart e tua gjithë allçi dhe baltë…Mbruje me pasion dhe atdhetari gjithçka krijove…
Agim ike në detet e përjetësisë….Ma hidhërove shpirtin Mik…Po, po ti e meritoje fjalen Mik, si rrallëkush…Dheu i lehtë artisti me A të madhe Agim Rada!
Discussion about this post