Duke marrë shkas nga rastet e fundit të dhunës seksuale ndaj të miturve në vend, ku më e fundit u raportua në Pogradec, Ministrja e Arsimit dhe Sportit Znj. Evis Kushi ka thirrur në një mbledhje urgjente drejtuesit e shërbimit Psiko-Social nga të gjitha bashkitë në vend.
Ministrja Kushi ka kërkuar që konstatimi i rasteve të dhunës të mos neglizhohet duke theksuar se konstatimi i psikologut të shkollës në raste të tilla është tejet i rëndësishëm për eliminimin e rreziqeve që u kanosen nxënësve.
“Nuk mund të mbyllim sytë në asnjë mënyrë përballë punonjësve, drejtuesve të shkollave apo mësuesve që përbëjnë kërcënim për nxënësit. Aktualisht numri i punonjësve të shërbimit psiko-social është dyfishuar, janë bërë trajnime për të siguruar mjedise sa më familjare në shkollë”, është shprehur Znj. Kushi.
Ministrja Kushi ka theksuar se ka patur raste që psikologët tanë kanë arritur të shmangin ngjarje të rënda, vetëm për shkak të reagimit në kohë, si dhe për shkak të angazhimit të gjerë dhe serioz.
Gjithashtu, Znj. Kushi shtoi se për parandalimin e ngjarjeve të dhunës apo abuzimeve ndaj fëmijëve apo nxënësve, duhet që në bashkëpunim të ngushtë më prindërit, të bëhet ndërgjegjësimi dhe nxitja e nxënësve që të flasin për çdo rrezik të mundshëm.
Discussion about this post